1389. November 17. - Dezember 3. Czarnowanz

In Nomine Domini Amen. Anno a nativitate eiusdem Millesimo Trecentesimo Octuagesimo Nono die Septimadecima mensis Novembris, In domo habitacionis honorabilis viri domini Nicolai Mroczconis de Marschowicz Custodis ecclesie Sancte Crucis Opoliensis, hora vesperarum vel quasi, Indicione undecima, In mei notarii publici et testium subscriptorum presencia personaliter Constitute deodevote virgines Philomena Priorissa, Gertrudis Circatrix et Helena Jagodzanka eorum tociusque Conventus Sanctimonialium Monasterii Domusdei alias in Czarnowans nominibus postulando humiliter supplicaverunt Religioso viro fratri Nicolao plebano in Opataw ibidem presencialiter existenti ut causa dei et beate virginis Marie et Ordinis honorem se intromitteret de procuracione administracione et provisione Gubernacione et tuicione earum in spiritualibus et temporalibus sibi onus assumendo, promittentes eidem Nicolao in bona fide et sub rerum suarum ypoteca quod vellent eum de omnibus attemptacionibus vexacionibus et fatigis exbrigare emancipare et indempnem reddere occasione procuracionis administracionis et gubernacionis quoquomodo iminentibus premissorum. Quiquidem Nicolaus videns earum angustias et tribulaciones et attendans contumelias earum et diffamaciones, respondit se premissa facere non posse nisi de consensu et Commenda Canonica domini Episcopi prius habita et obtenta. Demum tercia die mensis Decembris anni suprascripti prefatus frater Nicolaus, habitis commissione et Commenda Reverendissimi in Cristo patris et domini domini Wenceslai Episcopi Wratislauiensis. loco vacuo invento et Gubernatore penitus destituto, dicte Gubernacioni et administracioni se intromisit. Super quibus omnibus et singulis dictus frater Nicolaus a me Notario publico infrascripto sibi fieri peciit hoc presens publicum instrumentum. Acta sunt hec Anno Indicione die mensis hora et loco quibus supra, Presentibus Honorabili et discretis viris dominis Nicolao Mroczconis de Marschowicz Custode prefato, Nicolao de Niclin presbitero Wrat. dyoc. et Johanne Nicolai de Franconia Herbipolensis dyoc. et Januschio familiari dicti domini Nicolai Custodis testibus ad premissa vocatis specialiter et rogatis.
Signum notarii.
Et ego Petrus Schorgast quondam Jaschconis clericus Wrat. publicus Imperiali auctoritate Notarius, Predictis, postulacioni supplicacioni et responsioni, omnibus aliis et singulis dum sic ut premittitur agerentur et fierent, una cum prenominatis testibus presens fui, eaque sic fieri vidi et audivi, et in hanc publicam formam redegi, signo et nomine meis solitis et consuetis consignando rogatus et requisitus in fidem et testimonium omnium premissorum. Constat michi Notario prefato de rasura istarum diccionum tercia die mensis Decembris anni in octava et nona lineis sursum computando quas causa vicii non rasi et posui, sed erroris.

Aus dem Original von S, Vincenz. Auf der Rückseite steht: oblatum viiij die Januarii.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 1, Urkunden des Klosters Czarnowanz. Hrsg von dr W. Wattenbach, Breslau 1857.